大阪自由行

今次係我第二次去大阪,上一次已經係3年前跟團,今次自由行帶埋細妹去,去咗好多地方,食咗好多野,行到腳仔軟.

30/6/2009 DAY 1 我哋乘坐 國泰 早機,去到關西機場已經係下午3點,攞完行李就去搵 Shuttle bus 過Rinku Premium Outlet,好方便,100yen,10分鐘左右就到. 經過一輪血拼返酒店check in,已經係晚上7點. 放好行李即刻去搵食. 大阪新阪急飯店真係好方便,樓下就已經係車站,搭地鐡同JR都得,附近又有shopping center 同地下街. 第一晚我哋就食咗墨魚丸,餃子,咖哩飯,仲有大阪燒 (附相),個燒餅係可以自己落手落腳煎,不過我哋唔識整,都係勞煩師傅整,保證食得落肚.

DAY 2 食完個酒店早餐,我哋就出發去京都. 第一站係 錦市場,啱晒女仔行,想shopping有boutique 同精品店,想食嘢又有好多小食店,我地睇住師傅煎下翻下就整出好好味嘅蛋卷 (附相),. 和菓子老闆又好細心咁將各款和菓子用膠紙分隔開入盒 (附相),. 之後就去咗祇園,可惜見唔到藝妓. 接住去埋八坂神社,三十三間堂同清水寺,坐京都市營巴士好方便,最後坐返去京都JR 車站. 見時間尚早,就去咗手塚治蟲專門店. 6點幾就去樓下百貨公司食品部食嘢. 好多減價貨品,特別係魚生,見個職員無停手咁貼減價LABEL,有時間可以慢慢等,一定執到平靚正刺身. 食完嘢都只不過係 8點半,決定就過去 心齋橋、道頓堀行下. 雖然已經食飽飽,但行過金龍拉麵又俾佢嘅香味吸引咗埋去,叫咗一碗細嘅兩姐妹分. 食完行晒成條心齋橋就返酒店休息.

DAY 3去Universal Studios,一早食過酒店豐富早餐...出發.

由梅田坐JR過去大約廿分鐘,一出車站....嘩... 已經多人啦~ 仲有好多係着住校服嘅學生呀. 由於我哋係星期四去,唔駛點等,差不多所有機動遊戲同劇場表演都玩晒睇晒. 玩到5PM 就過去天保山,本來打算坐船過去,但我哋miss咗一班船要等多45min,所以轉去坐JR. 過到去喺天保山海洋館門口影咗幾張相就過去market place 搵食.大阪出名嘅食店都可以係裡面搵到. 食飽飽就返酒店休息啦.

最後一DAY,其實都係得半DAY. 我哋一早食過早餐,check out同暫托行李喺酒店,即刻出發去大阪城. 好好彩,去到時啱啱小火車到站,架小火車好靚,我哋不停影相. 一陣就入到天守閣. 入到去我哋每人借左部耳機,一路聽住講解一路參觀. 由於要爭取時間去買手信,我哋只可以走馬看花. 之後去咗心齋橋/道頓堀,行咗一陣轉場去黑門市場,不過因為唔識路,兜兜轉轉問左幾次人先去到黑門市場. 好快手咁買咗d手信就返酒店攞行李. 去到機場時間啱啱好. 4日眨下眼就過咗,真係好唔捨得走呀... 下次有機會,一定要去吓日本其他好地方.